Ditulis Oleh: A.S Patimarajo
Banyak kajadian maso kini nan ndak masuak diaka maso dulu. Sarupo manalepon di maa sajo wak bisa. Takana jo anak kamanakan di rantau, bisa mangecek langsuang dari parak.
Takana lo nak bakumpua jo kawan samo sikola. Bisa dikontak jo hape. Buek grup alumni. Di maa taragak batamu. Bisa. Malah kok maulang curito lamo, taragak lapeh di we a. Sambia duduak mangolai, dapek kaba nan tatulih. Tingga baco sajo.
Indak tuwo indak mudo. Zaman now, sado urang tapakua mancaliak hape. Banyak kalompok. Sabanyak sikola. Sabanyak tampek singgah. Sadonyo mambuek asiak.
Ndak sakadar itu sajo. Nan ketek kalene heboh jo mainan. Gim tu ndak sudah sudah. Tingkeknyo satinggih langik. Takah tu bana urang lain, mampadayo anak mudo awak. Abih harinyo jo gim. Lupo maapa palajaran sikola.
Tipak dek nan tuwo tuwo, lain pulo dayonyo. Sibuk baandai bakuncindan jo kawan sajawat di hape tu. Mintak batamu bakalompok. Dibuek etongan baru. Dulu kito bakawan, kini kito badunsanak. Kadang ado pulo nan dusanak pulang ka bako.
Ado lo kalompok salingka aua, sakampuang sa nagari. Balimpik limpik ando manyumando, ipa bisan, dalam grup tu. Kadang ado lo nan singkek pangana. Sumbarang taosok. Sadonyo basabuik, bakaluakan curito nan ndak patuik dibaco urang sumando.
Dek karano ikolah Mak Uniang ndak sato sato, bakalompok kalompok tu. Lai pulo baliau ba hape. Tapi cuma untuak mancaliak pangajian jo barita.
Kok ado sobok jo Malanca sudah sumbayang limo wukatu di musajik. Kutiko itulah Mak Uniang dapek kaba baru.
Malanca ndak baranjak dari hape. Lalok jo hape, makan caliak hape, duduak jo hape. Sadang sumbayang hape di saku juwo. Lah tagang jari dek hape. Cuma mandi nan ndak macik hape.
"Mak Uniang kan lai ba hape mah. Caliak sagalo info di sinan. Ko ka waden juwo batanyo an, " jawek Malanca kutiko Mak Uniang batanyo isu tarbaru, sudah sumbayang subuah, pagi tadi.
"Kan lai ado waang mah. Nan takun mancaliak hape. Manakua sapanjang jalan ka hape. Tu mangko ka waang waden tanyo," baleh Mak Uniang.
Malanca ndak dapek jawek....
