Ditulis Oleh : A.S Patimarajo
Di awal tahun tujuahpuluhan, samaso Mak Uniang ketek, sarik bana anak padusi makai jilbab. Anak sikola nan parampuan, baabuak panjang tajuntai takah mayang taurai. Ado pulo bajalin bakepang duo. Kok nan baabuak pendek tagerai hinggo bahu. Nan pakai jilbab, hanyo nan sikola ugamo.
Takah itu juwo urang karajo kantua jo guru di sikola. Banyak nan makai rok pendek sarato baju langan singkek. Kok ado nan pakai rok panjang sarato baju panjang langan, basalendang pulo di kapalo, itu hanyo guru palajaran ugamo. Ado nan lain surang surang, mungkin sifatnya sangek pribadi bana.
Dalam sahari hari di kampuang, induak induak saparo baya, hanyo bakain singkek di kapalo. Kalau ka balai hari pakan dipakainyo sanggua gadang. Di ateh sanggua tatap ado kain salendang. Sanggua ko dibuek dek tukang nan pandai.
Dulu tu, ado namonyo Etek Lis dari kampuang sabalah, tiok hari Salasa datang ka kampuang Mak Uniang. Pagi pagi sampai manjalang tangah hari, Etek Lis bajalan dari rumah ka rumah mamasangan sanggua palanggannyo.
Maso itu amak amak sanang makai sanggua ka pasa. Sanggua sasuai jo badan. Makin gadang badan, makin gadang pulo sanggua. Kabanya di kantua-kantua , sanggua ibuk dewe sasuai jo jabatan suaminyo. Makin tenggih jabatan makin gadang pulo sanggua ibuk dewenyo.
Untuak pangantin baru nan sudah baralek, paralu bana masang sanggua payi ka balai. Katando supayo urang lain tahu, baso inyo alah basuami, barumah tanggo. Istilahnyo: ketek bajalin, gadang basanggua. Mukasuiknyo jikok alun basanggua, barati masih anak gadih. Nan maa lah makai sanggua bararti lah jadi istri.
Zaman barubah, musim baganti. Kini lah banyak induak induak makai karuduang. Anak padusi sajak sikola esde sampai kuliah lah pakai jilbab. Malah ado nan makai hijab untuak muko. Sahinggo matonyo sajo nan bisa dicaliak.
Makai jilbab tu, kato ahli kasihatan dari lua nagari, elok bana manjago kapintaran utak. Kecek ahli tu, urang makai karuduang labiah kuek ingatannyo daripado urang nan suko mambukakak panutuik kapalo. Jilbab tu banyak manfaat. Dek itu pulo, mako Allah Ta'ala mawajiban supayo urang padusi manutuik abuaknyo. Abuak ko tamasuak aurat dalam ugamo. Tabukak abuak timbua doso.
"Jadi baruntuang bana anak padusi maso kini. Lah sameso jo jilbab panutuik kapalo. Dulu jilbab tu nampak aneh. Kini urang nan indak bajilbab tu nan aneh di kampuang kito ko," kecek Mak Uniang ka Malanca, sudah sumbayang subuah, pagi tadi, takalo bajalan pulang dari Musajik Tawakal.
"Sanggua ko samo jo konde, nan disabuik dalam puisi, pakan nan lapeh tu, Mak?" tanyo Malanca.
"Iyooo, sanggua tu nan konde. Kurang manangkok antene waang yo, Nca," jaleh Mak Uniang geleang kapalo.
Malanca maloyo....
