Ditulis Oleh : A.S Patimarajo
Kutiko si Akuf anak urang subarang payi ka Israel, pakan nan lapeh, banyak urang mangka mancaliak Akuf. Ado nan mangecek an si Akuf ko lah tamakan kaji Yahudi. Ado pulo nan manyabuik Akuf ko bana nan lah jadi Yahudi. Antahlah. Pokoknyo, macam macam kecek urang.
Pandapek urang nan mangka ka si Akuf ko, agak beda jo Tan Barain. Santano masih hiduik Tan Barain, pasti sanang inyo Akuf payi ka Israel tu. Sabab kecek Tan Barain, urang Yahudi tu dunsanak inyo.
"Kami ko saniniak mah. Kami ko samo samo sakaturunan. Untuang Akuf layi ka sinan. Mancaliak sapiah balahan kami," kecek Tan Barain suatu kali.
Dulu, maso Mak Uniang mudo matah, Tan Barain bacurito di lapau simpang. Keceknyo bakisah, maso itu. Yahudi jo Minangkabau, ampia ampia mirip. Minangkabau, kecek Tan Barain, asa katonyo, “Bainang Ka Yakubu”. Dalam baso aslinyo, baso Ibrani: B’nai Yakub. Aratinyo anak katurunan Nabi Yakkub.
Sataruihnyo, kecek Tan Barain, niniak muyang urang Minang turun dari Gunuang Marapi. Dimaa titiak palito, di baliak teloang nan batali. Dimaa asa niniak kito, dari puncak gunuang marapi.
Marapi ko, kecek Tan Barain, turunan dari kato “Marave”, bahaso Yahudinyo bararti “tampek nan paliang tenggih.
Sudah tu, sambuang Tan Barain, di lereang Gunuang Marapi niniak muyang kito mamulai mambukak lahan partanian. Kito manyabuiknyo manaruko. Asa katonyo iyolah taruko nan tanyato barakar dari bahaso Aram (bahaso Arab lamo), tarukh atau “tarack” dalam bahaso Ibrani.
Salanjuiknyo, surah Tan Barain, salah surang istri Rajo Iskandar Zulkarnain banamo Boendo Kendon dalam baso awaknyo Bundo Kanduang. Dalam bahaso Aram aratinyo isteri nan tacinto. Jadi Bundo Kanduang, tu adolah istri nan tacinto dek rajo .
Boendo Kendon, malahiakan surang anak nan banamo Than Kendon (bahasa Aramnyo bararti anak tacinto). Awak manyabuiknyo sabagai Dang Tuanku.
Labiah lanjut Tan Barain manyampaian, sabalun Sutan Maharajo Dirajo maningga di lereang Gunuang Marapi, baliau mawarihkan buku paraturan iduik untuak anak kamanakan Minangkabau. Namo buku tu Tamvo. Dalam bahaso Aramnyo bararti kitab pangakuan, nan manjalehan adat nan ka dipakai. Awak manyabuik kitab tu tambo.
Kitab tambo menyabuik an aturan aturan nan sangek jaleh. Tarutamo satantang matrilineal pawarisan pusako ka kamanakan parampuan. Caro takah iko samo jo nan dipakai urang Israel manyabuiknyo matrilinear.
Aturan matrilinear ko disabuik urang Israel tu Ad Tho’t. Bahaso Aramnyo bararti kapatuhan. Samo jo adat bahaso awaknyo. Urang Israel diakui bana bana Israel, nan ibunyo barasa dari bani bani nan ado di sinan. Bani ko, samo jo pasukuan di masyarakat Minangkabau.
Kecek Tan Barain ado duo baleh suku di Israel, yaitu: Ruben, Simeon, Lewi, Yehuda, Isakhar, Zebulon, Dan, Naftali, Gad, Asyer, Yusuf dan Benyamin. Suku suku tu turun dari kaum parempuan ka anak anaknyo. Samo jo di Minangkabau.
Nan lainnyo juwo ado hobi nan samo, kecek Tan Barain. Samo samo parantau. Samo samo panggaleh. Samo samo lihai mangecek. Samo samo galia.
Carito ko diulang Mak Uniang ka Malanca, sudah sumbayang subuah pagi tadi. Malanca manyolo, "Kok samo bana warih nan dijawek jo Israel tu, nan waden ndak badunsanak bagai jo inyo doh, Mak!"
"Yo, Nca. Samo pandapek wak mah," baleh Mak Uniang.
Sungguah pun baitu, Malanca baturo turo dalam hati. Mungkin inyo berang ka mandiangko Tan Barain.
