Ditulis Oleh : A.S Patimarajo
Gampo taraso duo kali, hari Satu patangahan bulan. Sadang elok gadangnyo. Malam manjalang subuah sakali. Sudah luhua manjalang asa sakali lai. Itu nan tajadi di kampuang Mak Uniang.
Kalau nan ketek ketek. Sakadar bagoyang salayang. Acok bana tajadi, ado nan ndak taraso. Tapi nan duo kali tu, yo mambuek cameh. Sadang balanjo di kadai, banyak urang nan mahambua kalua. Sadang bagolek dalam rumah lari ka pintu. Sabab, pakaro gampo ko, di kampuang Mak Uniang lah babakeh nyato.
Kecek urang kini, panyabab gampo tu ado duo: barasa dari gesek lempeang dalam tanah jo manyambua isi gunuang barapi. Pokoknyo dari lawik jo dari gunuang.
Samantang pun baitu, ado pulo tatulih dalan kitab maso lalu. Sarupo kecek urang tuwo tuwo saisuak, dalam kitab mujarabat. Katonyo dalam kitab tu, gampo ko sabagai patando ado nan katajadi sasudah iko.
Dalan kitab mujarabat tu, disabuik an, bilo gampo tajadi dalam bulan tatantu, mako ado patando kajadlan tatantu pulo, nan maikuik sasudahnyo.
Manokalo gampo tajadi di bulan Dzulkaidah, mako nan ka tajadi, jikok gamponyo pado siang hari, ka banyak praharo, banyak asuang pitanah dalam nagari, banyak pamuda indak menghargoi urangtuo.
Jikok gamponyo tajadi pado malam hari, mako ka banyak urang nan meningga mati, banyak nan bapindah ka nagari lain karano ndak saleso di nagari kito.
Nan musim kini tu, gampo tajadi malam hari tambah pulo siang hari. Sasuai jo isi kitab mujarabat, ngilu juwo Mak Uniang, ma agak i.
Tambah pulo Malanca batanyo sudah sumbayang asa di musajik tapi sawah, ndak lamo sudah gampo tajadi.
"Kini ko bulan Dzulkaidah yo, Mak?" tanyo Malanca ka Mak Uniang.
"Yo, Nca," jawek Mak Uniang cameh.
"Iko patando banyak pakaro nan ka tajadi dalam nagari sudah ko, Mak. Bisa langkok parasaian anak nagari sudah ko," uleh Malanca.
"Waang manambah cameh se mah. Kito sarahan sajolah ka Tuhan. Hanyo Allah Ta'ala nan tahu sagalo nan ka tajadi!" jawek Mak Uniang satangah pucek pasi.
Malanca lari.....
.jpg)
