Ditulis Oleh: A.S Patimarajo
We need to find a flag for him. Aratinyo, "Awak paralu mancari bandera untuak inyo," ba itu kecek reporter jo suaro takah ibo, kutiko si Sori urang kampuang Mak Uniang bolak baliak manyari bandera nagarinyo.
Mungkin Si Sori ko ndak disangko ka manjadi juara paculari di dunia ko. Makonyo bandera ndak disiapan dek tukang anta ka galanggang.
Untuak mailangan cangguang inyo bae dek si Sori batapuak tangan ilia mudiak. Sudah tu inyo bapoto poto jo kawan dari nagari lain nan basalimuik jo bandera nagari lain tu.
Untuang ado urang di galanggang tu maagiah bandera ka si Sori. Kabanyo, bandera nagari urang tu pulo. Tapi kutiko dipakai tabaliak, dek si Sori mako samo pasangnyo jo bandera nagari Mak Uniang.
Juara dunia pacu lari tu, akianyo lai gambira juwo. Lai sanang hatinyo. Bialah inyo sajo manikmati kamangan di nagari urang.
Ndak lamo sudah si Sori manang, kaba pacah di kampuang halaman. Sa isi nagari mamuji si Sori. Banyak pulo nan bajanji ka maagiah hadiah.
Sajak dulu sampai kini, Itu bana kalabihan urang kampuang Mak Uniang. Kok ka rugi mamikia saribu kali. Tapi kutiko ka balabo dulu pado nan lain tigo hari.
Alun tibo si Sori di kampuang, lah rami urang bakunjuang ka rumahnyo. Ado nan banazar maagiah bantuan ka kakaknyo. Ado nan bajanji maagiah pitih untuak balanjo. Ado pulo nan ka mamelok rumah si Sori nan yatim piatu. Ado nan ka maangkek si Sori jadi tuli, jadi dubalang bagai. Pokoknyo banyak nan jadi tuangku umar.
Kecek kakak si Sori, manjalang barangkek tandiang, si Sori mintak pitih ampek ratuh pambali sipatu untuak latihan. Kalau untuak batandiang lari, si Sori dapek pambarian sipatu nan mereknyo samo jo kawan samo pacu.
Untuang pulo untuak ka barangkek ka nagari jawuah tu, kabanyo, si Sori diagiah ongkos dek Pak Katua. "Cubo juwolah Sori. Untuang untuang manang waang. Ijan lupo bado'a yo," pasan Pak Katua manjalang si Sori barangkek.
"Ruponyo mukabua do'a si Sori. Juara lari inyo. Karano itu banyak urang sayang ka inyo. Banyak namo urang harum dek inyo," kecek Mak Uniang ka Malanca, sudah sumbayang subuah di musajik pagi tadi.
"Jadi kalau awak lah juara ko banyak urang nan sayang yo, Mak?" tanyo Malanca.
"Yo, itu lo adatnyo," jawek Mak Uniang jo suaro lunak....
