 |
| Ditulis Oleh : A S Patimarajo |
Pasbana.com-- Hujan labek manintiang ranah bundo pakan kapatang. Tajadi aia gadang banjia bandang. Akibatnyo: jalan rusak, jambatan putuih, ladang tandeh, sawah balunau, kadai hanyuk, rumah hancua. Malah ado anak kamanakan kito kahilangan nyawo.
Kecek niniak mamak rumah bagonjoang, ka urang surek kaba, tigo urang maningga tabawo aia gadang di Nagari Tanjung Bonai, Kecamatan Lintau Buo, Kabupaten Tanahdata, Kamih malam. Ado pulo tigo urang lainnyo maningga tatimbun lonsor di Parik Malintang, Kabupaten Padang Pariaman, hari Rabaah malam sabalumnyo.
Selain itu, kato baliau, ampek urang anak di Tanahdata hilang dibawo aia gadang.
Pancarian taruih dilakuan. Samantaro daerah nan kanai musibahko maliputi: Tanahdata, Limopuluahkoto, Sawahlunto, Pasaman, Pasaman Barat, Agam, Padang Pariaman, Solok, Sijunjuang sarato Pasisia.
Ba itu juwo nan manimpo dunsanak kito di kampuang sabalah, Mandailiang Natal, Tapanuli Salatan. Madrasah dihantam aia balunau, patang hari Jum'at. Sapuluah anak anak sadang mangaji maningga. Sabaleh pulo nan hilang dihanyuk aia.
Taradok, dunsanak jo anak kamanakan kito, nan lah bapulang ka hadirat Allah Ta'ala tu, molah kito do'akan, kok sampik dapek lapang, kok barek dapek ringan, kok angek dapek dingin, dapek juwo nikmat sarugo handaknyo.
Ba itu pulo kaluarga korban, nan dapek cobaan dari Allah Ta'ala, tabah juwolah handaknyo. Maningkeklah iman taqwa baliau. Tak guno kito baco asa muasa musibah ko. Kok kayu ditabang di ulu sungai. Kok utan nan lah langang. Rimbo nan lah data. Tasarahlah. Kini kito pulangkan sajo kapado Allah Ta'ala.
Kutiko caritoko disampaian Mak Uniang ka Malanca, di Musajik Tawakal, sudah sumbayang subuah pagi tadi, Malanca batanyo, "Ba a supayo tahinda dari musibah banjir kampuang kito ko, Mak?"
Mak Uniang mairuik angok dalam dalam.
"Banyak banyak istigfar kito, Nca. Iko lah takadia mah, Nca. Apo sajo nan tajadi di bumi ko, kahandak Allah Ta'ala. Kini iman sajo kito pakuek. Kok kapulang bana kito ka akhirat, layi sadang baiman taguah, kan ndak ba a doh," jawek Mak Uniang jo muko sabak suaro lunak.
Malanca tahanyak....
