Ditulis Oleh : A.S Patimarajo
Maranuang Mak Uniang samo surang. Kamaa payinyo kajayaan main bola maso dulu. Kini satiok malawan Thailand kalah taruih. Malawan Malaysia takah itu juwo. Patah sumangek akia akia ko, jikok di kana maso nan dulu.
Wakatu dulu, tasabuik main bola nagari ko santiang bana. Masuak parampek final Asian Games 1951, samifinal Asian Games 1954, urutan katigo Asian Games 1958, parampekfinal Asian Games 1966, parampekfinal Asian Games 1970, parampekfinal Asian Games 1986.
Sabalun tu, main bola nagari ko juara Merdeka Games di Kuala Lumpur, ampek kali (1960, 1961, 1962, 1969). Juara Agha Khan Gold Cup di Dacca, ampek kali (1961, 1966, 1967, 1968) sarato King’s Cup di Bangkok, sakali (1968). Di tim Asian All Stars 1966-1970, tacatat ampek pamain Indonesia Soetjipto Soentoro, Jacob Sihasale, Iswadi Idris dan Abdul Kadir. Pamain santiang.
"Kini maa nyo ganti urang urang tu?" tanyo Mak Uniang bakatai katai, ka Malanca sudah sumbayang subuah, pagi tadi.
"Alun lahia lai, Mak!" jawek Malanca.
"Pe es pe, Padang...di maa nyo kini?" tanyo Mak Uniang.
"Sadang lalok, Mak," jawek Malanca.
"Pe es be es, Batusangka...di maa nyo kini?" tanyo Mak Uniang.
"Sadang bakaruah, Mak," jawek Malanca.
Ey yayai, lah abie padie dek jawie. Mak Uniang marutok dalam hati....
