Ditulis Oleh : A.S Patimarajo
Dulu Nabi Sulaiman, mananti Ratu Balqis di labuah gadang balapih ameh. Mungkin haragonyo limo ratuih miliyar sakilo. Kiro kiro limo miliyar harago jalan tu sadapo. Karano jalan balapih ameh ko dibuek rajo paliang kayo dunia, tantu iyo maha.
Kutiko ka manyubarang aia, ratu rancana ka maangkek bajunyo nan maesoh jalan. Tapi Sulaiman managahan. "Jan diangkek pulo lai ratu. Jambatan ko lah ambo lantai jo kaco. Aia di bawah kaco ko mah," kecek Sulaiman.
Balqis tananang mancaliak istana Sulaiman nan tabuek dari batu parmato barlian. Sambia mamuji ratu mintak tingga di Nagari Sulaiman. Tapi inyo ibo lo maninggaan istananyo nan jauah di Nagari Sabah.
Kecek Sulaiman, "Ijan rusuah bana lai Balqis, beko kito pindahan kamari istana di Sabah tu". Dalam hal iko Sulaiman mamanggia urang siak nan doanyo mukabua. Sakijok mato istana Balqis pindah dari nagari Sabah ka nagari Sulaiman.
Ba itu Ungku Malin bacurito ka murik muriknyo maso mangaji di surau sasudah bagolak dulu. Kecek Ungku Malin maso itu, apo sajo karajo dikakok, asa awak bado'a sarato mandakek kapado Allah Ta'ala, mako karajo nan rumik bisa murah. Tapi bilo awak takabua, karajo murah bisa jadi sarik.
Tambah Ungku Malin pulo, jikok ado awak maraso rusuah dalam hiduik, mako pareso ama ibadah awak sahari hari. Mungkin ado doso jo kasalahan. Karano itu ubeknyo, banyak banyak awak istigfar, mintak ampun ka Allah Ta'ala.
Ba itu juwo, jikok ado barang barang kabutuhan maha. Itu patando ado doso nan kito pabuek. Tamasuak kalau ado pamimpin awak kaliru mambiak kaputusan, itu tando banyak rakyat babuek doso. Karano itu bilo awak mintak pamimpin nan adia, pabanyak sajo istigfar, sarato babuek baiak. Tingkek an ama ibadah.
Kutiko carito ko disampaian Mak Uniang ka Malanca, sudah sumbayang subuah pagi tadi, Malanca manyolang, "Ba a pulo dek karano ama ibadah kito rakyat badarai ko, pamimimpin nagari babuek ndak adia?"
"Iyo ba itu, Nca. Jikok awak lah mambaiki ama ibadah. Mako Allah Ta'ala mangirim pamimpin nan adia untuak nagari awak ko," jawek Mak Uniang.
Malanca bakato dalam hati, mungkin dek karano maksiat banyak, harago barang kabutuhan jadi naiak. Karano itu, inyo batekad mamelok i diri jo ama ibadah, kok lai katurun harago...
