Malapeh Kabek

Ditulis oleh : AS Patimarajo

Pasbana.com --- Kaba kaba angin, ado kisah maso dulu sudah bagolak, Inyiak Wali mangecek, jikok ado anak kamanakan nan baru tamat sikola alun dapek karajo, mako datang sajolah ka rumahnyo manjapuik pitih tiok bulan.

Mandanga  bunyi saluang nan bak kian, satangah urang kampuang picayo. Saparo lai indak picayo. Sabab salaweh ko nagari, sabanyak itu anak sikola tamat tiok tahun,  ka baliau gaji tiok bulan, alun babaun talunjuak wak lai, kecek nan indak yakin.

Samantaro urang nan puciyo buto, ka Inyiak Wali, yakin bana iko bisa. Kabara banalah putih panggajinyo tu. Beko barutang molah awak ka induak samang. Kok ado pitih dibayia utang tu. Kok alun ado pambayianyo batangguah molah kito dulu. Ba itu kayakinan baliau tu.

Sasudah muncuang talompek, akianyo, Inyiak Wali  barundiang jo koleganyo. Satantang caro mambayia janji ka anak nagari nan tamat sikola. Sabab samusim masak padi lai, anak sikola ko baratuih ka tamat. Jikok  tibo inyo di tapi paga mintak balanjo, ba a kamambayianyo. Ndak mungkin mailak taruih caro nan taralah.

Maso tu, ado usua dari surang nan rapek. Kecek baliau, kito mintak sarek  buku ranji anak anak tu tujuah turunan. Kok lah jaleh asa katurunannyo, baru kito bayia. Jikok ndak tantu dek inyo dimaa turun niniak muyangnyo mako ndak usah dibayia.

Mako dicubo undang tigo urang anak nan lah tamat sikola ka rumah Inyiak Wali. 

Diimbau surang surang anak tu masuak ka dalam biliak. Ditanyo:

"Waang lah tamat sikola?"
"Alah Mak?"
"Siapo namo apak waang?"
"Maralun, Mak"
"Maralun tu siapo apaknyo?"
"Midun, Mak."
"Midun tu siapo apaknyo?"
"Kabanyo si Usuih, Mak."
"Siusuih tu siapo apaknyo?"
"Carito Apak wak, namonyo Labai, Mak."
"Labai tu anak sia?"
"Ndak tantu lai, Mak. Ndak ado apak wak mangecek doh."
"Tanyo ka apak di rumah yo. Baru kamari baliak bulan muko," kecek patugeh.
"Apak wak lah mati, Mak," jawek anak tu jo ibo hati.
"Kok baitu, ndak bisa waang manarimo pitih ko doh. Sabab turunan waang ndak jaleh," baleh patugeh.

Sudah tu anak ko tarumuak pulang.

Anak nan surang lai, apa dek inyo ranji sampai tujuah turunan. Tapi patugeh nanyo, ado awak punyo sawah ladang.

 Anak tu manjawek, punyo. Mako patugeh mangecek, "Waang urang kayo, ndak pantas manarimo piragiah ko doh. Malu awak jo urang lain," kecek patugeh. Kasudahannyo pajo pulang kosong.

Anak nan ka tigo apa pulo ranji tujuah turunan, indak pulo punyo sawah ladang. Ditanyo karajo urang gaek dek patugeh. Dijawek anak tu mangaleh ketek ketek. Mako patugeh ndak amuah maagiah.

"Waang anak urang panggaleh, apak waang pandai nyari kepeang. Malu awak," kecek patugeh.

Akianyo di musim itu, ndak ado nan bisa manarimo bantuan.

Kutiko carito ko diulang Mak Uniang ka Malanca sudah sumbayang subuah pagi tadi, Malanca tangango.

"Banyak caro malapeh kabek, yo Mak?" tanyo Malanca.

"Malapeh tabek nan barek, Nca. Malapeh kabek takah itu tu ringannyo," jawek Mak Uniang.

Malanca paniang...