Ditulis oleh: A.S Patimarajo
Wakatu Mak Uniang si SMA dulu tahun lapanpuluhan, ado istilah kawan kawan: manyarahlah. Aratinyo mangaku sajolah taruih tarang. Ijan banyak gadele juwo.
"Manyarahlah kawan. Aa juwo lai. Alah mah. Kok ndak tantu manyarah sajolah," kecek surang kawan kutiko kalua main.
Mukasuik kawan nan mangecek tu, jikok ndak dapek ulangan nan diagiah guru pagi cako, mangaku sajolah , baso ndak bajawek soal tu.
Ijan karano malu, awak mangecek an juwo soal tadi lai barisi. Padohal indak ado isinyo. Mako dari pado baduto, ancak bataruih tarang sajo. Manyarahlah.
"Ba a, kawan lai dapek ujian tadi?"
"Lai. Tapi waden karang karang sajo."
"Ba a lo bisa kawan karang karang. Samantaro jaweknyo pasti mah."
"Yo, daripado karateh ndak barisi."
"Manyarahlah kawan."
Aratinyo kecek kawan ko, manyarah sajolah. Kok ndak dapek jaweknyo katokan sajo awak alun siap ujian. Mintak wakatu lain hari ujian susulan. Dari pado jawek soal bakarang karang. Atau dari pado karateh jawab tak barisi. Ancak manyarah sajo ka guru. Mintak ujian lain wakatu.
"Dek karano istilah manyarah ko, tenar maso itu, mako kato manyarah ko, baunjai unjai sampai ka lua paga.
Sakali wakatu, kawan makan soto di kadai Emi di bawah kadai Rigai, sampiang ruang praktek IPA. Nan Mak Uniang sato duduak sajo. Mako tibo kanti maagiah etongan, apo minum kawan?
Mak Uniang maso itu, manjawek kanyang jo baso basi. Akianyo kawan ko mangecek, "Manyarahlah. Beko waden mambayia."
Maso itu, di pasa Batusangka juwo tadanga istilah manyarah ko. Ado pareman tukang angkek bagurau jo kawannyo, "Manyarahlah, Ndan." Aratinyo ndak ba a doh batangguah dulu manahan salero, malakik dapek pitih.
Lamo lambek kato manyarah ko bakambang jadi macam macam. Sarupo: mangangolah, badendanglah, bakaruahlah.
Jikok kalah main domino, manyasa manurunan batu, mako mangecek kawan di luwa, "Mangangolah lai. Sumbarang sajo batu diturunan."
Kutiko kisah ko diulang Mak Uniang ka Malanca sudah sumbayang subuah pagi tadi, Malanca ndak mangarati. Karano tu inyo batanyo, "Apo mukasuik carito Mak Uniang ko?"
"Kok ndak ngarati waang, a mangango lah lai," baleh Mak Uniang.
Malanca haniang...
