 |
| Ditulis oleh : AS Patimarajo |
Pasbana.com - Kawan Mak Uniang samaso kanak kanak dulu, ado banamo Non Koboy. Sabananyo namo baliau Sinon. Cuma dek tagiah manonton pilem koboy Hiron Horse, nan bintangnyo Ronal Regen, kawan kawan maimbau Sinon sabutan koboy. Mako lakeklah gala Non Koboy.
Kecek urang tuwo tuwo gala ko samo jo do'a. Kalau awak bagala datuak cadiak, mako suato maso pasti cadiak. Kalau awak bagala datuak binguang, mako suatu maso pasti binguang.
Kalau Sinon sajak ketek tamasuak anak nan mada. Payah diagiah pangarahan. Lasi urang gaek manunjuak aja baliau. Tamat sikola inyo marantau ka Jawa. Maso mudo tu, baliau mangaleh kaki limo di Tanahbang.
Namonyo hiduik di rantau, adang mandapek adang indak. Kadang balabo kadang rugi. Tapi Sinon Koboy tatap juwo batahan jadi urang manggaleh. Nan dijuwanyo ringan ringan sajo: baju kaus, kain handuak, sarato kain kain kaparaluan badan lainnyo.
Suatu kali Sinon agak mandamam. Badan angek salero patah. Makan kurang lamak. Akianyo ndak bisa mangambang galeh. Sapakan duo pakan mandamam. Lamo lamo pokok tamakan. Kasudahan Sinon baliak kandang, pulang kampuang. Salamat tingga tanah batawi.
Tibo di kampuang Sinon barubek badah ayam. Dicari tawa nan ampek. Diminum sagalo ramuan. Diabuih aia angek untuak mandi. Dimunum ubek rumah sakik. Dimakan talua ayam kampuang untuak sihat. Barakat rajin mamintak pado Allah Ta'ala, akianyo Sinon sihat.
Tasabab kutiko sakik bajanji jo dirinyo. Jikok sihat badan ko, dipagunokan untuak masyarakat di kampuang. Sajak itu Sinon rajin mambarasihan surau tampek sumbayang bakaum kaum. Inyo azan bilo wukatu masuak. Sambia mauruih surau, baliau juwo manjadi santri di Pasantren Darul Ulum Padang Magek. Sampai kini mangaji kitab kuniang jo Ungku H. Jakfar Imam Mudo.
Baliak ka kisah namo nan dulu maso ketek diimbauan Non Koboy. Tanyato kini Sinon batua batua indak koboy. Sinon kini lah jadi urang siak. Urang taat baiadah. Hiduiknyo taratur jadi patani di kampuang.
Kecek Sinon biya di kampuang hiduik sadarhana, asa ibadah tajago. Dikaja bana kayo ka kota, beko acok tingga sumbayang bajamaah, rugi gadang awak.
Yo paten Sinon Nan Indak Koboy. Malanca jo Mak Uniang salut....
