Maramian Alek

Oleh : AS Patimarajo

Pasbana.com --- Kawan Malanca  nan sorang ko elok laku. Kapatang baliau sato jadi Caleg. Tapi kalah. Kalahnyo yo kalah bana. Sabana bana kalah. Inyo ndak dapek suaro dari pamiliah nan ado.

Kutiko dihituang di TPS, kawan ko cuma dapek ciek suaro. Itulah suaronyo nan usali. Itu suaro inyo bana. Inyo surang nan mamiah namo inyo di karateh suaro.

Ba a bisa takah iko?

Karano kawan ko di kampuang sorang sajo. Baru pulang dari rantau. Anak jo rang rumah baliau lah lamo di subarang. Urang sabalah rumah lai tahu inyo mancalon.

Tapi tak mamiliah inyo. Mungkin lah dapek dek urang lain. Atau mungkin tatangga ko dunsanak pulo dek Caleg lain.

Sabananyo baliau punyo handai tolan, karib karabat, sanak sudaro di kampuang. Tapi sadonyo dunsanak tu, mamiliah urang lain. Maklum sajo maso maso mancaleg kapatang ko, ibarat bataruang hiduik mati.  Kadang awak samo awak lago sakandang  barabuik suaro.

Samantang pun baitu, walau tak ado suaro, nan kawan ko tatap tasanyum. Tak ado parubahan. Tak ado kacewa. Tak ado maampeh suok kida. Santai sajo. Limo wukatu tatap sumbayang bajamaah ka musajik.

Raba ah,  kapatang sudah sumbayang luhua, basobok jo Mak Uniang sarato kawan kawan lain di laman musajik. Sambia galak sengeang, baliau bacurito lamah lambuik jo baso Malayu Tinggi.

"Suara saya dialihkan," keceknyo.

"Dialihkan bagaimana?" tanyo kawan kawan lain. 

"Pemilih saya itu, yang mengalihkan pilihannya pada orang lain," keceknyo bayobana.

"Jadi, dapat duit Saudara itu?"

"Tidak dapat duit saya. Pemilih itu tak mau milih saya," jaweknyo data.

"Apa alasannya, tak mau milih Saudara?"

"Karena saya selama ini kurang dekat dengan mereka," jaweknyo lasuah.

"Kalau begitu, setelah ini ndak usah saja berpartai lagi. Lebih baik kita urus pesantren saja lagi," kecek surang kawan lain maagiah saran.

"Ya, benar itu," keceknyo tasanyum.

Kawan ko ndak banyak kecek. Sabab katonyo: banyak kecek banyak sasek. Banya kato banyak duto. Banyak gadele banyak tele. Banyak kicuah banyak taruah. Banyak galia banyai jahia.

"Berapa Saudara habis, kemarin itu," panciang surang kawan lain.

"Tak ada saya habis," keceknyo luruih.

"Sewaktu minum makan di warung, jumpa pemilih bagaimana?"

"Justru saya yang dibayarkan orang orang itu," keceknyo pulo.

Mak Uniang manahan galak. Dalam hati bapikia, mungkin kawan ko sato mancaleg kapatang tu, disuruah Malanca  maramian alek....