 |
| Ditulis oleh : AS Patimarajo |
Pasbana com --- Langang musajik pagi tadi. Dicaliak Malanca ndak ado. Ungku Imam ndak tampak. Mak Uniang takah tu pulo. Sahinggo batanyo surang jamaah dalam hati. Apo garan nan tajadi?
Amak amak nan biaso tigo barih, kini tingga duo barih. Kamaa urang urang ko?
Ndak lamo sudah tananang, ado surang jamaah lain manyapo, " Ba a tamanuang, Malin?"
"Iko haa, Nyiak. Kamaa kawan kawan hari ko? Langang jamaah subuah kini?"
"Oh, Lupo, Malin? Jamaah banyak payi ka subarang?"
"Ka subarang maa?"
"Ka Jawa. Urang urang ko barangkek sudah luhua kapatang jo kapatabang?"
"Sia sia nan payi?"
"Banyak. Malanca jo Mak Uniang, Mak Adang bagai nan payi."
"Manga tu?"
"Kabanyo ka Sanayan?"
"Ooohhh. Biyalah. Bilo urang urang tu baliak?"
"Beko sudah luhua, kaba no. Baliau baliau tu baliak samo samo cater patabang."
"Yo yo. Alah paham kito," tutuik Mak Malin sambia malangkah jalan pulang.
Tibo di rumah, Mak Malin manalepon Mak Uniang. Tapi ndak masuak. Hapenyo mati.
Sudah tu ditaleponnyo Mak Adang. Layi masuak tapi tak diangkek.
Sudah tu dicubonyo manalepon Malanca. Layi manjawek, tapi kurang tadanga karano Malanca mangecek bisiak bisiak. Suaronyo lunak bana.
Hampia saminik talepon di talingo Mak Malin, cuma sapatah kato nan jaleh. Tipiwan tiwan.
Akianyo Mak Malin imbau cucunyo mintak iduik an tipi. Nampaklah urang rami rami. Labiah pado sumbayang rayo di tanah lapang gadang.
Sikileh nampak Malanca sadang bazikia di sampiang Mak Uniang jo Mak Adang. Sudah tu ndak nampak nampak lai.
Yo rami yo rami, kecek Mak Malin dalam hati, sambia mandaceh daceh. "Manyasa wak ndak sato," bisiak Mak Malin samo surang.
