 |
| Ditulis oleh: AS Patimarajo |
Pasbana.com -- Dulu maso sudah bagolak, sarik urang nan punyo oto. Apak Siyun kutiko itu lah jadi supir oto tambangan. Oto nan dibaok Apak Siyun tu, rami anak anak mancaliak.
Ado nan mangakok dindiang, mangakok lampu, mangakok roda. Pokoknyo sato maresek malapeh taragak mamacik oto.
Siyun berang kalau oto apaknyo dikakok. Satiok anak anak mandakek ka oto tu, dihariaknyo. Sahinggo banyak anak anak nan mancaliak dari jauah sajo. Kacuali Muhua.
Simuhua ko cadiak. Inyo datang ka Siyun mambaok goreang pisang. Diagiahnyo Siyun goreang pisang tiok pagi. Tiok patang hari.
Sajak itu, Muhua laluaso sajo naiak oto Apak Siyun. Inyo lalu lalu sajo mangakok dindiang oto Apak Siyun. Malah sado remeh temeh oto Apak Siyun tu bisa Muhua manyaliak.
Ba itu juwo Muhua bakuaso ateh anak anak nan ka mandakek ka oto Apak Siyun. Sabab Siyun nan lah dakek ka Muhua, jadi sangek patuah ka Muhua.
Kok ado anak anak nan taragak mangakok oto Apak Siyun, musti mintak izin ka Muhua. Beko si Muhua nan mambuliah an untuak mandakek ka oto Apak Siyun.
Sakali wakatu Siyun jo kawan kawannyo basiarak jo kalompok Siwan dari rumah sabalah. Tajadi patangkaran kutiko mamiliah juara pidato.
Ampia bacakak banyak, dek ulah juri takarik. Siyun sangek diharok an dek kawan kawannyo untuak ndak mambuliahan lawan sabalah mandakek ka oto apaknyo.
"Jadih," kecek Siyun, "Sado nan mandakek urang sabalah tu, waden hariak."
Tapi kalompok Siwan mandakek ka Muhua. Dipaciknyo Muhua dek Siwan. Supayo Siyun bapihak ka inyo.
Dek karano Siyun lah tabiaso patuah ka Muhua, Siyun dapek parintah dari Muhua supayo maninggaan kawan kawannyo.
"Ancak awak bagabuang jo Siwan. Siwan tu kawan waden mah," kecek Muhua ka Siyun.
Siyun patuah. Inyo mambaliak. Inyo tinggaan kawan kawannyo. Inyo larang kawan kawan tadi mandakek ka oto apaknyo.
Parintah Muhua, nan buliah mandakek ka oto Apak Siyun hanyolah kawan kawan dek Siwan. Salain kawan Siwan musti diusia. Siyun hanyo ikuik parintah.
Siyun bagaluik galuik jo Siwan. Siyun basanda gurau jo kalompok Siwan sambia makan makan.
Kawan kawan Siyun tapurangah ba ibo hati. Siyun babaliak arah malawan inyo. Siyun ndak mahu tahu. Inyo maraso nan dikecek an Muhua bana sadonyo.
Kutiko carito ko disampaian Mak Uniang ka Malanca pagi tadi, sudah sumbayang sibuah di musajik, Malanca batanyo.
"Ba a bisa takah tu, Mak? Patuah bana Siyun ka Muhua?"
"Karano lah tapangaruah," jawek Mak Uniang.
"Tapangaruah dek apo tu, Mak?"
"Goreang pisang," jawek Mak Uniang lunak sambia jalan malucuih.
Malanca tamanuang apo arati carito Mak Uniang pagi ko.....
