 |
| Oleh: AS Patimarajo |
Pasbana.com --- Hiduik di dunia ko, hanyo main main. Basanda gurau, bagarah garah. Sia nan tarok yobana mancari bahagia di dunia ko, mako tamasuak inyo urang sasek. Sabab, dunia ko cuma kaparaluan, bukan tujuan. Nan sabananyo hiduik tu di akhirat nantik. Mako dari itu molah kito siapkan baka untuak hiduik kito di akhirat supayo santoso dalam sarugo.
Baitu kecek Ungku Malin, maagiah pituah, maso Mak Uniang mangaji di surau takalo kanak kanak dulu. Kato Ungku Malin, siapo urang nan mangaja kamuliaan di dunia, jo caro buruak, pasti akhiratnyo sansaro. Sabab, nan dapek dek inyo cuma doso. Doso panduto, doso kianat, doso maubah angko angko. Doso lain nan maikuik sasudahnyo.
Tapi kalau kito mangaja kamuliaan di dunia jo niat jo caro elok elok. Mako kito alah manuju kabaikan akhirat sabananyo. Umpamonyo kok jadi panguaso niat ibadah. Jadi rajo niat ibadah. Mangaleh niat ibadah. Bakarajo niat ibadah. Sado nan dikakok sajak jago sampai lalok, sadonyo niat ibadah. Kamuliaan dunia akan tabawok sajo.
Ado pulo dalam pita kaset, maso itu, tukang dendang, manyabuik, iduik di dunia ko hanyo pangguang sandiwara. Di siko awak hanyo icak icak sajo. Icak icak jadi rajo. Icak icak jadi panguaso. Icak icak jadi rang kayo. Icak icak sadonyo sampai manutuik mato. Abih carito.
Karano itu, katonyo, apo lo nan kito panggak an ka urang lain. Saratuih tahun nan lalu kito alun lahia. Saratuih tahun mandatang kito pasti lah mati. Tak ado nan bisa kito patahankan apo nan kito dapek di dunia nan panuah tipu dayo ko.
Kecek urang arih bijaksano, sangek bodoh, hino bana, kok ado urang di dunia ko, nan mambiak muko manyari kamuliaan. Apo layi kok bamungko duo. Saligi baliak batimba, tak ujuang pangka manganai. Kianat. Sadang basakutu malawan musuah, nan inyo bamanih manih jo pihak lawan. Munapiak. Asakan awak salamaik, bajuwa murah harago diri.
Kutiko carito ko diulang Mak Uniang ka Malanca sudah sumbayang subuah pagi tadi, Malanca batanyo, "Kok ado urang nan ndak amuah baranti jadi panguaso, ba a tu, Mak?"
"Kalau caronyo elok elok, lai baluruih luruih, ndak ba a doh, Nca," jawek Mak Uniang.
"Kok jo caro galia, ba a tu, Mak?"
"Itu salah niat mah, Nca."
"Biyalah salah niat bagai, keceknyo. Ba a tu, Mak?"
"Badoso. Masuak narako akianyo, Nca."
"Kok inyo sonsoang juwo, ba a, Mak. Inyo ndak takuik jo narako doh keceknyo?"
"Itu mukaluak gilo mah, Nca. Mukaluak tak bamalu. Mukaluak bodoh. Ndak urang bagai tu doh. Jubilih batubuah tu mah. Sikalera. Anak hantu..!!" jawek Mak Uniang bakatai katai sambia jalan malucuih.
Malanca mahariak, "Kaamaaa tu, Mak, lah lari sajo!!"
"Maoh lahia batin awak ka puaso," jawek Mak Uniang sayuik sayuik sampai.
Malanca sanyum jo langkah gontai....
.jpg)
