 |
| Ditulis oleh A.S Patimarajo |
Dulu manjalang repormasi, kampuang halaman, sarato rantau luhak nan kurang aso limo puluah, disungkuik kabuik. Angok sasak rakungan taraso padiah. Ndak tantu ka sia ka mangadu, salain kapado Allah Ta'ala nan babuek sakahandaknyo.
Indak tajadi karusakan di muko bumi, malainkan ulah tangan manusia nan manghandaki. Baitu tasuo dalam kaji. Pas pulo katubah maso itu, di Musajik Tawakkal, diisi Ungku Japen nan kareh suaro.
"Apo doso nan lah kito pabuek salamo ko? Mako mintak ampunlah kapado Allah Ta'ala. Sadonyo azab nan turun kapado kito, karano kito nan manyaru," kecek Ungku Japen.
Kato Ungku tu, ndak paralu awak manyalahan urang lain. Awak sadonyo nan salah. Awak nan ndak adia mamarintah. Awak nan manimbang barek sabalah. Awak nan mambiyakan riba bakambang biak. Awak nan ndak taat manjago ugamo. Awak nan mambuek sakalamak paruik.
"Sadarlah wahai anak cucu Adam. Barantilah babuek zalim. Ingek hiduik ka mati," kecek Ungku tu jo suaro lantang.
Ungku tu, kadok mancaliak ka Malanca nan duduak di tangah sabah suok. Hati Malanca maraso, ba a mangko inyo nan kanai tuduah.
"Denai ndak manga manga doh, Mak. Manga denai nan kanai tuduah, asa lai ka manokok sae Ungku Japen tu," kecek Malanca ka Mak Uniang maulang kisah maso lalu, sambia bairiang pulang ka rumah sudah sumbayang subuah pagi tadi.
"Inyo tu, ndak manuduah waang bagai doh, Nca. Sadonyo jamaah kanai siram aia basuah maso itu mah, " jawek Mak Uniang.
"Tapi Ungku Japen tu, kadok bana mancaliak ka denai, " baleh Malanca.
"Tantu iyo ka waang, inyo acok maliek, sabab jamaah nan lain tu, urang dareh dareh sadonyo," pinteh Mak Uniang.
"Jadi, denai ko tampek palapeh bangih ko, Mak? "
"Iyo, Nca. Untuak malapeh bangih tu, ka urang nan dakek jo awak. Sabab kok ka urang lain. Beko mambaliak urang tu."
Malanca tamanuang, barunyo tahu, Ungku Japen tu mamak sapasukuan dek inyo....
.jpg)
