Pasbana - "Baa kondisi di kampuang kini, Mak?" tanya kamanakan manyaliak di HP.
"Lai ambo mamantau dari medsos. Lai banyak tibo bantuan," angan Mak Adang.
"Ambo tonton di medsos, ado di TikTok bagai. Tapi nan mangganja di kapalo, ambo paratian, tiok ado bencana alam, barabuik urang maagiah pituah nasehat sagalo macam. Banyak konten pidionyo nampak di ambo. Pagi kajadian, siang lah bagaduru nasehat jo pituah," sambuang Mak Adang.
"Aa contoh pituahnyo?" kecek kamanakan panasaran.
Mak Adang mambuek muko manggarang, "Iko contohnyo: 'Itulah, dek babuek doso juo!', 'Itulah, sombong juo!', 'Itulah, ulah nan padusi-padusi karano begini jo begono juo!'
Lah induak-induak pulo nan jadi sasaran disalahannyo.
"Kan nasehat nan elok tu Mak...di ma salahnyo?" kamanakan balanjo.
"Elok nan dikatokannyo, tapi salah wakatunyo. Baa deh bagageh bana mambuek konten pidio coitu?" Mak Adang mangaliah mato.
"Kalau ado bencana manimpo dunsanak kito, usah kito malah mangato-ngatoinyo, usah dipasalahan juo. Misalnyo kamanakan jatuah jo Onda, tagaletak di aspal. Tu tibo urang mamberangi, 'tu lah ndak pake helm juo, iko dek lampu sen mati, ndak ikuik aturan, kini rasai lah...patah kaki tu!'
Lah jaleh urang sadang kamalangan tu bacaci maki pulo. Kok indak tatolong jo pitih dan tanago, doa sajo cukuik! Kok ka maagiah nasehat, tunggulah waktu nan tapek, cari hari nan tanang. Tunggu kariang aie mato dulu. Indak baitu guruah baitu patuih doh! Eeyayaaaaiii......."
Mak Adang bamambuah lapiak manangisi nasib urang campanakan di kampuang.
"Sabaaa Mak, jan sampai naiak lo gulo darah Mamak..." kamanakan ma nanangan. (*)
